سماج مسلم سماج کے اخلاقی ارتقاء میں اللہ تعالی کی پسند و ناپسند کی تاٴثیر

Abstract

پیشِ نظرمقالہ کامدعا یہ ہے کہ قرآن کریم نے مسلم سماج کی اجتماعی تربیت اور اخلاقی ارتقاء کا سامان پروردگار ِ عالم کی محبت اور عدم محبت کی بنیاد پر فراہم کیا ہے۔ اِس تحقیق کا محور «حُبّ» اور «لاحُبّ» کی آیات ہیں جس میں یہ جانچنے کی کوشش کی گئی ہے کہ اللہ تعالی کی اپنے بندوں سے محبت یا عدمِ محبت، بندوں کی کن صفات کے گرد اور کیونکر گھومتی ہے۔ مفروضہ یہ ہے کہ ان صفات کے اجتماعی اثرات ہی در حقیقت باعث بنے ہیں کہ اللہ تعالی کی محبت یا منفوریت ان صفات کے شامل حال ہو جائے۔ اس تحقیق کا مقصد اس نظام حیات کی ترسیم ہے کہ جس کے تحت یہ آیات ایک خاص نظم میں ڈھل کر سماجی روابط کو اخلاقی بنیاد فراہم کرتی ہیں۔ یوں یہ نوشتہ، اس سوال کا جواب دینے کے درپے ہے کہ اللہ تعالی کی «حب» اور «لاحب» سے متعلقہ صفات کس طرزپر اسلامی سماج کے اخلاقی ارتقاء میں کردار ادا کرسکتی ہیں؟
یہ مقالہ دو حصوں پر مشتمل ہے۔ اس حصے میں بطور مقدمہ یہ جائزہ لیا گیا ہے کہ اللہ کی محبت کی حقیقت کیا ہے اور یہ ایک فرد پر کیا اثرات چھوڑتی ہے؟ مقالہ ہٰذا کے آئندہ حصہ میں قرآنی آیات کی روشنی میں افرادکی اُن صفات کا جائزہ لیا جائے گاجن کی بنیاد پر وہ اللہ تعالی کے محبوب یا منفور ٹھہرتے ہیں۔ نیز اِن صفات کے مسلم سماج کی اخلاقی، اجتماعی تربیت کے ساتھ رابطے کی نوعیت کو بھی اجاگر کیا جائے گا۔ بطور کلی، اس تحقیق کا پیغام یہ ہے کہ اللہ تعالی کی محبوبیت کا حصول ایمان کے درجات میں کمال تک پہنچنے کے لیے انتہائی اہم ہے۔ یہ کمالات سماجی روابط کو عدل و انصاف، احسان اور تقوا کی بنیاد پر استوار کرکے ایک جدید نظم اجتماعی کی بنیاد بنتے ہیں۔ اس نظم اجتماعی میں مسلم سماج حیاتِ طیبہ پا سکتا ہے۔